Það er ótrúlegt að hugsa til þess að vera að mæta í vinnu aftur eftir sumarfrí sem leikskólakennari. Ég var einmitt að hugsa þetta í dag en um leið glöð að vera búin með þennan áfanga og takast á við ný verkefni og komast aftur í rútínu. 
Þó má ekki gleyma því að verkfall er í sjónmáli ef ekki semst við leikskólakennara en ég vona heitt og innilega að leikskólakennarar fá þessa leiðréttingu á sínum launum því þetta er ekki til að hvetja fólk að hefja nám því peningar hafa yfirleitt alltaf eitthvað að segja um hvort þig langi að læra þetta fag eður ei. Ég er ekki að tala um græðgi heldur um að fólk þarf víst að ná endum saman í hverjum mánuði og það verður ekki sagt að laun leikskólakennara nái því alltaf. Eins og ég segi þá vona ég að um semjist áður en verkfall hefst. 
Oddur hefur verið að vinna hjá Sæferðum og líkar vel, ég og Elínbjört sjáum hann meira þetta sumarið en oft áður enda vinnutíminn annar en við áttum að venjast.
Svo það skemmtilegasta þetta sumarið sem ég bíð spennt eftir en það er ferðalagið sem ég ætla í ásamt mömmu, Snæbjörtu og Bergdísi en einnig koma Kristín frænka og Bergþóra með okkur til Torontó í Kanada. Við höfum verið að safna okkur fyrir ferðinni með því að skúra Baldur og því verður þetta ennþá skemmtilegra því maður hefur verið svo duglegur að safna hehe.
Svo verða dönsku dagarnir næstu helgi og ég á ekki von á neinum gestum í mitt kot nema þá rétt til að kíkja smá. Þetta verður bara gaman og mig hlakkar til að njóta næstu helgar í góðra vina hópi ( því Oddur er að vinna) og fá mér smá í litlu tánna  

Já það er spurning hvort sumarið sé komið en júní er alveg að klárast og júlí að taka við. Maður verður víst að átta sig á því að maður býr á Íslandi og veðrið í samræmi við það. Væri samt alveg til í að fá nokkra daga með logni og sól því útiverkin hlaðast upp hérna. 

Það er ekki mikið að frétta hér á bæ en Oddur er hættur að vinna hjá Ragnari og Ásgeiri og farin að vinna hjá Sæferðum. Hann er að vinna á bátnum Særúnu og er aðstoðarmaður skipstjóra. Honum er ekki að leiðast þessi vinna og nýtur þess í botn að vera stundum búin að vinna kl 5 á daginn en þannig var það sjaldnast í útkeyrsluvinnunni. Svo verður bara að koma í ljós hvað hann tekur sér fyrir hendur í haust. Honum langar í nám og það er bara gott mál.

Ég kláraði háskólann og útskrifaðist 11 júní s.l. það er bæði gaman og skrýtið að vera ekki á leið í skóla í haust. Maður er loksins "orðin" eitthvað því nú get ég titlað mig sem leikskólakennara. Veit þó ekki hvort það sé sniðugt því launin eru víst ekkert til að hrópa húrra fyrir. Finnst þessi hækkun sem ég á von á til skammar en miðað við gömlu samninga félags leikskólakennara og nýju samninga Samflots þá næ ég að hækka í launum um 30 þúsund krónur. Er það þess virði að leggja á sig 3 ára háskólanám ( eða nám yfir höfuð) og ná 180 einingum fyrir 30 þúsund ? dæmi hver fyrir sig. Einnig var okkur nemendum tjáð að við gætum gengið inn í hvaða leikskóla sem væri og fengið vinnu en það er víst ekki svo einfalt í dag, sveitafélögin eru með kvóta hversu mörg prósent af starfsfólki sé með sérmenntun og hverjir séu ólærðir. Þetta er víst ekki hvetjandi en þar sem ég hafði fundið mitt framtíðarstarf þá hefur þetta sem betur fer ekki haft áhrif á mína ákvarðanatöku. Nú hefur námið verið lengt í 5 ár og ég vona að þessir ráðamenn sem semja fyrir sveitarfélögin taki það með í reikninginn. 

Allavega þá byrja ég að vinna á deildinni Vík í ágúst og mig hlakkar bara til. Búin að vinna þar áður og þá var dóttir mín á sömu deild og ég. Hætti þar þegar ég fékk brjósklosið í bakið og skipti þá um deild. Núna er ég s.s. að fara aftur inná Vík að vinna með 1 - 2 ára börnum. Þetta verður spennandi verkefni því ég hef aldrei unnið með 1 árs börnum þó ég hafi leyst af þarna. Svo er spurningin hversu lengi ég verð á þessari deild hehe. Ég hef verið ansi dugleg við að fara á milli deilda og finnst æðislegt að fá tækifæri til að vinna með börnum á öllum aldri. En nóg um mig :0)

Elínbjört verður elsta barnið í leikskólanum næsta vetur að öllu óbreyttu. Litla barnið mitt er s.s. að fara í leikskólann og á bara 1 ár eftir. Ótrúlegt hvað tíminn er fljótur að líða en um leið gaman að fylgjast með barninu sínu þroskast og dafna. Litla klára barnið mitt er farið að skrifa nafnið sitt með stakri prýði en spurði mig hvort mitt nafn væri jafnlangt og hennar (hennar nafn er 9 stafir og mitt 8) og þá mundi ég hvað ég blótaði mömmu og pabba fyrir að skíra mig svona löngu nafni, sérstaklega þegar átti að skrifa allt nafnið sitt (SÓLBJÖRT SIGRÍÐUR) það tók heila eilífð að skrifa þessa 16 stafi. Svo geri ég það sama við barnið mitt og skíri hana tvemur fallegum nöfnum (ELÍNBJÖRT KRISTÍN) en núna vona ég að hún blóti mér ekki mikið hehe.

Þá held ég að fréttir af heimilinu séu komnar og nöldur dagsins búið.

Kv Sólbjört Leikskólakennari 

Hæ hæ
Já það er nóg að gera á þessu heimili, skólalok (vonandi) og þá tóku við almennileg þrif á húsinu enda veitti hreinlega ekki af þar sem yfirborðsþrif voru mjög vinsæl á þessu heimili vegna tímaleysis en þetta er allt að koma. Einnig hafa önnur verkefni hrannast upp sem þarf að klára og því um að gera að vera duglegur við að vinna upp það sem ég ætlaði að gera eftir að skólanum lyki. Ég á eftir að fá út úr einum áfanga og þá 1 verkefni og svo prófi en eftir mínum útreikningum er ég búin að ná þessum áfanga en þori ekki að fagna fyrr en það er endanlega staðfest og það gerist vonandi á morgun. Einnig sá ég áðan að ég komst ekki inn í framhaldsnámið sem ég sótti um og það kemur svo sem ekkert á óvart en það hefði samt verið gaman að komast inn í námið. Maður prófaði allavega að sækja um hehe. Dóttir mín verður ábyggilega voða ánægð að mamma sín skuli ætla að nýta tímann í eitthvað annað en bækur og tölvunotkun.
Sumarið ætti að vera komið en veðrið er ekki á því og við hér í Hólminum fáum að njóta þess að hafa rok, snjókomu og frost, geggjað alveg. En ég vona nú að þetta veðurfar fari að taka enda svo hægt verði að vinna einhverja útivinnu því bæði húsið og garðurinn mega við smá viðhaldi. Þannig er það nú bara.
Það verður skemmtileg breyting á næstu dögum þegar ég útskrifast og get farið að kalla mig leikskólakennara en það er eitthvað sem ég bjóst ekki við þegar ég sótti um í leikskólanum árið 2000. Ég ætlaði einungis að vinna þarna þangað til ég fyndi eitthvað annað og betra. Ég ætlaði að fara í ferðamálatengt nám en örlögin gripu heldur betur í taumana og ég fór í háskólanám þó var ég ekki búin með stúdentinn. Yndislegar konur sem unnu/vinna með mér og yndisleg börn, ég hélt að ég hefði ekki þolinmæði í að vinna með börnum en í dag finnst mér þetta ótrúlega gaman og vona að börnunum finnist það líka.
Ég fór í haust að fylgjast með frænda mínum á danssýningu en leist svo ekkert á blikuna þegar ég hafði "passað" börn frá 1 - 10 bekk enda fannst mér ég ekki búin að vinna svo lengi í leikskóla en það sýnir kannski fram á að ég er á nokkuð réttri hillu í lífinu. Vona það.
En útskrift á næsta leiti og svo verður sumarið bara skemmtilegt þó ferðalögin verði kannski ekki mörg en þau verða skemmtileg.
Kv Sólbjört næstum útskrifaða 

Hæ hæ
Langt síðan maður skrifaði seinast, svo langt að ég man ekki hvað var í síðustu færslu. Allavega þá hef ég vonandi lokið náminu til B.Ed. gráðu í leikskólakennarafræðum. Það hefur verið ómæld vinna en um leið ótrúlega gaman, kynnst nýju fólki og skemmtilegt nám þó maður hafi ekki haft tök á að rækta vinasambönd við gamla vini á meðan.
Leiðin liggur þó bara uppá við núna og á stefnuskránni er að hitta fleiri og gefa sér tíma fyrir stelpuna.
Elsku barnið mitt er orðið 5 ára, hún var 2 ára þegar ég byrjaði í náminu og þekkir því lítið annað en mömmu sem er með kassótt augu af því að horfa á skjáinn á tölvunni og þegar hún fór að hafa meira vit bað hún mömmu sína oftar en ekki að geyma tölvuna og tala við sig. Þetta gat sko tekið á taugarnar að hafa ekki meiri tíma með henni en við reyndum þó að nýta frítíma vel.  Hún er allavega í skýjunum yfir því að námið sé búið. 
Nú skal beðið eftir einkunnum svo maður geti alveg örugglega útskrifast en kennarar eru ótrúlega lengi að skila inn einkunnum fyrir verkefni sem löngu er búið að skila og því bætast bara við fleiri og fleiri grá hár. Vonast þó eftir að einkunnir fari að skila sér.
Nú tekur hversdagsleikinn við og ég ætla mér að blogga hér nokkuð reglulega fyrst ég hef tíma og kannski einhver nenni að lesa þetta en þó veit maður ekki þar sem leikirnir á fésinu geta tekið ómældan tíma frá manni.
Læt þetta duga í bili
Kv Sólbjört næstum útskrifaða